القائمة الرئيسية

الصفحات

ممكن تكون فرصتك الاخيرة !!

ناوى على اية يمكن تكون اخر فرصة 

افرض انى قلتلك هتموت كمان ٦ أيام ودي أخر فرصة ليك في الحياة تعمل فيها كل ال تقدر عليه من الأعمال الصالحة قبل ما تموت

ومعاك ورقة وقلم اكتب فيها كل ال هتعمله خلال الأيام دي 

يا ترى هتعمل ايه وشكل حياتك في ال ٦ أيام هيكون ازاي؟

تعالى بقا يا حبيبي ننفذ ده بجد هات ورقة وقلم واكتب انهم اخر ٦ ايام المتبقيين في رمضان هم أخر أيام حياتك وشوف هتعمل فيهم ايه ينفعك في قبرك وأخرتك

أخر أيام حياتك _ أخر رمضان في حياتك _ اجتهد فالناس نيام وإذا ماتوا انتبهواوعجلت إليك رب لترضى  

وسارعوا إلى مغفرة من ربكم وجنة عرضها السموات والأرض أعدت للمتقين 

إن الذين قالوا ربنا الله ثم استقاموا تتنزل عليهم الملائكة ألا تخافوا ولا تحزنوا وأبشروا بالجنة التي كنتم توعدون ♥️

لو جينا نتكلم عن الذنوب بااستفاضة شويه الذنوب ال هى الحائل الأساسى لاستجابة الدعاء الذنوب ال لو اتمحت فى ليلة القدر يبقا انت اتولدت من جديد

 الذنوب بتدمر الشخص حرفيا. تدمير أقرب للحقيقة لا للمجاز 

أتذكر انني في أحد الرمضانات، أنعم الله عليّ بالاعتكاف مع بعض رفاقى في العشر الأواخر.. يعني طول اليوم إنت محافظ على سمعك وبصرك ولسانك مما يجلب الذنوب  مفيش مسلسلات.. مفيش إعلانات في الشوارع.. مفيش سب وشتايم حواليك.. مفيش تريندات وخناقات ومشاكل مفيش إباحية.. أقصد الإباحية بمفهومها الأوسع، حياتنا بقت محاطة بقدر من الإباحية ولامفر هتمشي في الشارع هتشوف إعلانات، هتشوف بنات متبرّجة، هتفتح لعبة هتشوف إعلانات اباحية، هتفتح الفيس بوك إعلانات، يوتيوب إعلانات، ده كمان بجانب الأفلام والمسلسلات، وغيرها وغيرها من المواقع.

وكذلك حافظ حواسك  من الغيبة والنميمة والفُحش الي بقى تقريبًا مُلازم للقعدات واللمة فى أغلب الاماكن

ويومك كله وسطهم مقضيه بين الصلاة في الصف الأول،  وتلاوة القرآن، وقصص السير، والأذكار،والأكل، والشرب، ومجالس العلم،  والحكاوي الحلوة وغيره.. فضلنا كده عشر أيام تقريبًا لم أخرج من المسجد إلا لشراء بعض الأشياء بجانب المسجد.

مش قادر أنسى شعورنا وإحنا خارجين في آخر يوم عشان نصلّي العيد.. حرفيًا محدش عايز يخرج!.. وبدأنا نسأل بجدية: هو إحنا لازم نخرج يعني؟ أنا عايز أفضل هنا!..أنا مرتاح كده مش عايز اخرج

حاسس ساعتها بإحساس غريب جدًا ممكن مش هيوصلك وأنا بقوله دلوقتي بس من أعظم المشاعر الي حسيت بيها في حياتي... حسيت إني (نضيف)!.. عارف يعنى اى نضيف من جواك ؟ نضيف حقيقي.. بس مش نضيف في الظاهر فقط.. لأ أنا حاسس إني نضيف جوا وبرا ماشي بلمع كدا. منوّر! لا والله مش مجازًا صدقني، إنت منور من جوا فعلا وده إحساس حقيقي واقعي وملموس لدرجة إن أوّل صديق ليّ شفته لما خرجت من المسجد قالي ما شاء الله إيه النور ده! فأنا استغربت جدًا والله مع احتمال إنه بيجاملني عادي ولكن لعل الأمر الذي أشعر به بداخلي ليس مجرد شعور داخلي أو مجازي وإنما له تجليات ملموسة  رُبما  اه  ورُبما لا.

 حاسس كده كإني خفيف.. روحي خفيفة جدًا.. عايز تطير للسما !..

حاسس إني مليااان جدًا. شبعان!. مطمئن. جوايا سكينة غير عاديّة.

مش قادر بالكلمات البسيطه دى أوصلكم شعورى وقتها يمكن ال مر بيه يقدر يستشعر الجمال ده

وشعور تاني بقى أجمل وأجمل.. كنت حاسس إني (مُحترم).. عارف شعور إنك محترم؟ شعور انك حابب نفسك كانها شخصية جديدة خاليه من الذنوب زى الاطفال

إنك حابب نفسك ومحترم نفسك كده وماشي بتنظم هدومك، وماشي ملو هدومك كده وحاسس بقيمة نفسك ومقدّرها  وشايفها عزيزة وغالية عليك كده ولا تستحق منك أن تبتذلها في مقام لا يليق بيها؟من الاخر حابب تفضل كده

حاسس إنك منشكح وعايز الناس كلها تنشكح زيك، مش فاهم ليه الناس متعصّبة كده وبتتخانق على تفاصيل مش مستهله!

كلام عامى  وخطابي وكرتوني شويه صح؟ عارف  بس صدقني اللغة قاصرة جدًا في وصف الأحوال!

صدق من قال إن هذه المقامات مقام أحوال لا أقوال.

ساعتها انا مش هنسى  أبدًا أول ردّ فعل حصل ليّ لما عيني جت غصب عني على بنت ماشية في الشارع بهيئة مش ال هى. أنا  لأول مرة تحصلى  قشعريرة في جسمي كله! أنا حتى  مفهمتش فيه إيه! بس اتضايقت جدًا ، وحسيت كأن لمبة بداخلي انطفأت للتو! وثقلًا في روحي رُبط بها  فأنزلها إلى الأرض! وحسيت بقى الإحساس الي بحاول أمهّده لك كل ده... حسيت إني (اتدمرت او اتدنست)... عيني اتدنست!... قلبي تدنس.. حاول تتخيل شعورك لو كنت ماشي وجت عربية طرطشت عليك مية ملوثه  عارف نوع القرف والاشمئزاز الي هتحسه ده؟ أنا حسيت زيه بالظبط ساعتها، لدرجة إني كنت عايز أروّح دلوقتي أغتسل!عاوز ارجع للشعور ال فات تانى مش عاوزه يفارقنى


ساعتها لأول مرة في حيااتي أقرأ حديث رسولنا صلى الله عليه وسلم بعين جديدة ، وهو يقول:

{إنَّ العبدَ إذا أخطأَ خطيئةً نُكِتت في قلبِهِ نُكْتةٌ سوداءُ، فإذا هوَ نزعَ واستَغفرَ وتابَ سُقِلَ قلبُهُ، وإن عادَ زيدَ فيها حتَّى تعلوَ قلبَهُ، وَهوَ الرَّانُ الَّذي ذَكَرَ اللَّه كَلَّا بَلْ رَانَ عَلَى قُلُوبِهِمْ مَا كَانُوا يَكْسِبُونَ}

الذنوب فعلًا مُهلكة للروح وللبدن كمان مُظلمة للنفس، وبيتغذي عليها شيطانك وهواك، يعني مش بتكسر شهوتها أو بتقللها ولا حاجة بل بتقويها عليك أكتر وأكتر.. وبتنزع البركة من كل حاجة في حياتك البركة في وقتك   في صحتك.. في علمك . في صفاء ذهنك وسكينة قلبك في علاقتك بالخلق.. في كل حاجه 

.مع الوقت بتحس فعلًا إن قلبك من كتر الذنوب اصبح جاف وقاسي، ورُوحك مضلمة  حياتك بقت تعيسة وبهتانة عارف الي بيقولك حاسس إني مطفي ؟ صدقني ده أصدق وأدق وأعمق تعبير عن هذه الحالة  إنت فعلا طفيت كل منفذ للنور في قلبك يعنى القلب ده  بقى عليه غلاف أو حجاب كثيف جدًا (بل ران على قلوبهم) حجب عنك كل نور.

وتحس فعلا إنك تقيل مربوط جامد في الأرض   ساعتهابس حسيت بقوله تعالى: (يا أَيُّهَا الَّذِينَ آمَنُوا مَا لَكُمْ إِذَا قِيلَ لَكُمُ انفِرُوا فِي سَبِيلِ اللَّهِ اثَّاقَلْتُمْ إِلَى الْأَرْضِ ۚ أَرَضِيتُم بِالْحَيَاةِ الدُّنْيَا مِنَ الْآخِرَةِ ۚ فَمَا مَتَاعُ الْحَيَاةِ الدُّنْيَا فِي الْآخِرَةِ إِلَّا قَلِيلٌ).

انا بقولكم كل ال فات ده عشان نوصل اننا فعلا فى ايام وليالى بفضل ربنا ممكن تقلب موازين حياتك وتمحى الران ال على قلوبنا ونرجع تانى نضاف من جديد كيوم ولدتك امك مازالت الفرصة متاحة للاجتهاد  ليلة القدر ال كلها نفحات وأمان وتحول رهيب ليلة القدر ال ربنا ورسولنا وصانا منضيعهاش ربنا بيحبك ربنا عاوزك وخايف عليك ربنا عاوز ينجيك اى مستنيه ايه لسه الفرصة متاحه بلاش نضيعها اجتهد لعلها الليلة 

فبالله عليك ركز في عبادتك وقرب من ربنا اللهم حسن خاتمة يارب العالمين اجتهد لعلك تأخذ ثواب ليلة القدر إن شاء الله تعالى 

وادعيلي معاك

فاللهم أعدني إلى تلك الحال ولا تحرمني منها، واغفر لنا ما مضى، وجنّبنا الفتن ما ظهر منها وما بطن، واغفر ذنوبنا، وأعنا على ضعف نفوسنا.. وآنس وحشتنا وأعنا على ذكرك وشُكرك وحُسن عبادك، وافتح علينا فتوح العارفين بك.

تعليقات